Sak: Informasjon frå lokalt organisasjons- og kulturliv

Møte: 13 Sep 2022

Drøfting

BAKGRUNN

Det er umiddelbart innført eit forbud mot reklame/informasjon frå frivillige lag og organisasjonar (som kostar eller kan koste) på Høyanger skule. Unntaket er ei komande tavle i aulaen. Det er no noko uklart om den nye praksisen er gjeldande for kommunen, eller for skulen. Rektor på skulen skriv at rektorane i kommunen er samde om «ei felles forståing for kva som ligg innanfor ramma i regelverket.». Vi tolkar difor dette som eit felles forbud på skulane i kommunen. Skulemusikken har teke kontakt med FAU då dei meinar dette er for strengt, og at det øydelegg for organisasjonslivet i kommunen. FAU er spørjande til kvifor kommunen køyrer ein slik prosess utan involvering og informering. Dette er eit gjentakende problem vi har teke opp med oppvekstsjef i dialogmøte. Vi skreiv difor eit brev til politikarar og skuleleiinga der vi etterlyser nettopp involvering og informasjon om saka – samstundes som vi stiller spørsmål til kva grunnlag eit slikt forbod kviler på.

PROSESSEN

Det var uheldig at ikke rektor stod på mottakarlista, men dette er ei utfordring vi meinar ligg på oppvekst- og kommuneleiing i større grad enn på skulen.

Vi registrerer også at FAU får korreks for ikkje å gå tenesteveg med saka. Vi har lagt saka fram for statsforvaltaren i Vestland, og også FUG nasjonalt: Begge responderer med at FAU ikke har nokon tenesteveg, heller tvert om. FAU kan og bør samarbeide, kontakte, kritisere og ytre seg til kven dei vil: Både andre organisasjonar, politikarar og i det kommunale byråkratiet. Vi stiller oss også undrande til at det er dette vert så sterkt vektlagt og gjenteke i svaret.

INFORMASJONSARBEIDET

Saka viser ei utfordring vi har teke opp ved fleire høve: involvering og informasjon – og då spesielt mangelen på skriftleg informasjon og referat.
Vi meinar framleis det er eit minimum at den nye praksisen bør skriftleggjerast. Manglande informasjon både til tilsette, organisasjonslivet og oss i FAU har gjerne bidrege til at saka har eskalert og at skulemusikken reagerer sterkare enn nødvendig. Engasjement frå foreldre og frivillige er avgjerande for samfunnsutviklinga i Høyanger; at desse ikkje er tekne med på råd i denne saka er svært uheldig.

Vedlegg

3. sept 2022: Hausthelsing frå FAU Les
Eposten vart sendt til kommunedirektør, ordførar, kultursjef, oppveksfjef, kommunestyret og leiar i Høyanger skulemusikk

Hausthelsing frå FAU ved Høyanger skule

Vi håpar de alle har hatt ein god og flott sommar. FAU har også vakna litt til liv. Som ei
oppfølging av punkt 3 i sommarhelsinga frå juni der vi under «Budsjett, prosess og
prioritering» etterlyser ...gode prosessar som involverer elevar, tilsette og foreldre.

Forrige veke fekk vi melding frå dugnadsgjengen i skulemusikken. Dagen før eit avtalt besøk i 2.
klasse fekk dei melding frå skulen: Reklame for aktivitetar som kostar – eller på sikt kostar, er
forbudt på skulen. Dette vart bestemt på rektormøte onsdag.

Vi etterlyser (nok ein gang) informasjon, involvering og prosessar i slike avgjerder. Seinast på
dialogmøtet før ferien tok vi opp konkrete prosessar der skulen/oppvekst tek avgjerder og køyrer
prosessar utan informasjon, involvering av verken foreldre eller elevar. Vi meiner dette no må
takast grundig tak i, rimeleg umiddelbart på “heile fjøla”. Frå kommunedirektør, til oppvekstjef –
til den enkelte kontaktlærar. Vi må spele på lag.

Er det ikkje naturleg å involvere både FAU, elevråd og SU/SMU – i ei slik avgjerd? FAU er ikkje
ein gong informert. Vi finn heller ikkje info om dette nokon stad. Det er heller ikkje etablert
kultur/rutinar for produksjon/publisering av referat frå relevante fora (t.d. rektormøte), slik vi
etterlyste i dialogmøte.

I dialogmøtet før sommaren var det sagt «Det er (som mor) vanskeleg å finne ut kva tilbod som
faktisk eksisterer». På det same møtet uttalte oppvekstsjef at «Det er på FRITIDA ungdata viser
dei største utfordringane». FAU etterlyste også ei oversikt over fritidstilbod for ungdom. Eit
innspel vi forstod oppvekstsjefen ville ta opp med kultursjef. Vi gjentok dette i sommarhelsinga,
då for aktivitetar i sommar. Vi kan ikkje sjå dette er prioritert, verken til sommaren eller i arbeidet
med ny heimeside for kommunen.

Om vi skal meine noko om avgjersla ism. skulemusikken: Vi kan ikkje sjå at avgjersla er heimla
nokon annan stad enn ei «lokal Høyanger-lov». I utdanningsdirektoratet si rettleiing, Reklame i
skolen, står følgjande i eit eige kapittel om dette temaet:
3.5 Unntak fra bestemmelsen – reklame fra lokalt kulturliv:
Reguleringen av reklame i opplæringsloven § 9-6 og privatskoleloven § 7-1a er ikke
tenkt å ramme denne formen for reklame.
Det fremgår her at hensikten med bestemmelsen ikke er å vanskeliggjøre vilkårene for
det lokale kulturlivet. Det må derfor legges til grunn at henvendelser til skolen fra lokalt
kulturliv om å få sette opp reklameplakater og spre materiell for konserter, utstillinger
eller andre kulturelle tiltak med et ikke-kommersielt preg bør aksepteres.

Vi minner enno ein gang om at kommuneplanen sin samfunnsdel har kun eitt overordna mål: Høyanger kommune skal i planperioden auke talet innbyggjarar i aldersgruppa 20-40 år.

For
FAU ved Høyanger skule
Jeanette Walsvik, Leiar

Last ned originaldokument
4. sept 2022: Svar frå rektor Les
Hei Jeanette

Eg har akkurat fått vidaresendt hausthelsinga de i FAU har sendt til kommunalsjefen med fleire, der de rettar direkte kritikk om blant anna skulen sin informasjonsflyt. Då finn eg det rart at dette er noko de ikkje har tatt opp med meg, som rektor ved skulen, fyrst? Det er ikkje meir enn ei god veke sidan du i klassekontaktmøte refererte til det gode samarbeidet med skulen. Kva har skjedd? Slik de har skrive det her står det ganske så direkte at det er mangel og/eller ingen informasjon eller drøfting mellom skulen og dykk (FAU). Eit samarbeid skal vere gjensidig, og då forventar også eg at de nytter tenesteveg og speler ball med skulen som fyrste instans, til dømes ved å spele saka inn til SU (samarbeidsutvalet).

Det er svært få på mottakarlista som har føresetnad for å kunne svare dykk ut på punktet angåande reklamering. Kvifor har ikkje dette spørsmålet blitt retta til skulen fyrst? Kva vil de oppnå med å halde skulen utafor, utan høve til å kunne gi eit svar? I dykkar attforteljing her er det fleire feil og manglar. Dette kunne ha vore rydda av bana ved å ganske enkelt sende meg ein e-post eller tatt ein telefon. Involvering og informasjonsflyt går begge vegar.

De kan spele inn saka til neste møte i SU ved å sende meg ein e-post. Eg stiller meir enn gjerne opp i dykkar FAU møte, slik eg har gjort før, om det er hastesaker eller anna de ønskjer å drøfte berre med skulen.

Vonar dette var ein glipp, og at vi kan halde fram det gode samarbeidet vidare. Det er berre å ta kontakt, eg er sjeldan lengre enn ein telefon unna, til og med seint ein søndags kveld.

Med venleg helsing

Gro Nes Hommedal

Rektor
5. sep. 2022: Epost frå Einar Rysjedal (Raudt) Les
Takk for inform.

Einar
7. sept 2022: Oppfølgingsmail frå rektor Les
Hei Jeanette

Vi fekk berre ein kort passiar på måndag, så eg tenkte eg ville fylle ut svaret mitt litt meir. Angåande reklamering/distribuering av informasjon knytt til betalte fritidsaktivitetar i skuletid.

Avgjerda om å takke nei til distribuering og informasjon om betalte tenester i skuletid er ikkje å rekne som ei ny avgjerd. Praksis har alltid vore at vi ikkje skal eksponere elevane direkte for reklame, noko som er heimla i Opplæringslova §9-6 (Skoleeigaren skal sørgje for at elevane ikkje blir utsette for reklame som er eigna til å skape kommersielt press, eller som i stor grad kan påverke holdningar, åtferd og verdiar, mellom anna på skolens område, i lærebøker og andre læremiddel som blir nytta i opplæringa.) Vi har derimot praktisert unntaket, som er heimla i i Ot.prp.nr.41 (2006 – 2007) (Det skal framleis vere mogeleg med reklameplakatar frå lokalt kulturliv om konsertar, utstillingar og andre kulturelle opplevingar. Dette kan vere reklame for lokale konsertar, Ungdommens kulturmønstring, teateroppsetninger, skolerevy osv. Reguleringen av reklame i opplæringslova §9-6 er ikkje tenkt å ramme denne formen for reklame). På rektormøtet som de nytta som referanse i skrivet dykkar blei det bedt om ei presisering då praksis og tolkinga har vore noko ulikt praktisert. Det blei ikkje tatt noko avgjerd, men gjort ei tolking der vi kom fram til ei felles forståing for kva som ligg innanfor ramma i regelverket.

Det som ligg i botn her er opplæringslova §9-6 som seier at vi ikkje skal utsetje elevane for reklame som kan påverke bl.a. haldningar, åtferd og verdiar. Ved å opne opp for at aktørar kjem inn i klasseromma og vidare distribuerer materiell direkte til elevane ser vi på som ei ugrei eksponering, i alle høve om det som det vert reklamert for kostar pengar. Det vi derimot har gjort, iht presiseringa i Ot.prp.nr. 41, er å ta imot og henge opp materiell som er lett tilgjengeleg for både elevar og føresette. Då eksponerar vi ikkje elevane direkte, men lagar ein arena der elevane sjølve kan oppsøkje informasjonen. Dette har vi gjort på oppslagstavle t.d. i aula. Vi har no òg kjøpt inn ei utandørs oppslagstavle som vi vil henge opp til dette føremålet. Elles har vi også oppmoda tilbydarar som har kome innom om å ta kontakt med klassekontaktane og vidare nytte klassane sine facebooksider. Noko som vi har fått attendemelding på er ein god arena som når alle, og kjapt.

Av tidlegare saker som vi har drøfta i SU knytt til t.d. gratisprinsippet kan eg nemne skulemjølkordninga og skulefotografering. Begge desse sakene var det skulen som spelte inn til drøfting i SU, og som de i FAU vidare var med på å kome med uttale om. I begge desse sakene fall vi ned på at både skulemjølkordninga og skulefotograferinga skal vere eit tilbod ved Høyanger skule. Begge desse ordningane er i gråsona av gratisprinsippet, og det er rom for tolking og bruk av skjønn. Vi fall den gang ned på at desse tilboda ikkje skal direkte reklamerast for, men orienterast om. Informasjon og distribuering av fritidsmateriell har ikkje tidlegare vore ei sak som har blitt meldt til SU, ei heller no. Eg tenkjer at vi set det på saklista til neste SU. Denne type drøftingar må meldast, tenesteveg, og vidare handsamast i skulen sine rette organ. Dette tar som oftast litt tid, og saker skal ofte på høyring, fram og tilbake. Eg har forståing for at dette er noko de gjerne skulle ha handsama no då rekrutteringstoget for oppstart av aktivitetar går no. Den eller dei som har tatt kontakt med dykk, dugnadsgjengen i skulemusikken? – ref. skrivet dykkar, er velkomne til å ta direkte kontakt med meg, så skal vi finne ei løysing på å gjere materiellet deira tilgjengeleg.

Som vi snakkast om så snarast måndag, så trur eg den beste løysinga framleis er å gå vegen om kultur og ei samordning av alle fritidsaktivitetar, òg gjerne digitalt. Kanskje til og med ein dynamisk kalender som også pop-up aktivitetar og sesongbaserte tiltak kan kome inn (t.d. turlaget, karusellrenna osv). Det hadde vore heilt topp! Då hadde ein kanskje t.o.m. unngått kollisjonar mellom aktivitetar. Denne saka har de spelt inn tidlegare, og dei blei også diskutert på dialogmøtet. Eg har fått attendemelding frå kommunalsjefen om at den er meldt til kultur og at dei er i gang med å sjå på løysingar. Om eg ikkje høyrer noko innan neste SU møte skal eg etterspørje status.

Vonar dette var eit litt meir oppklårande svar enn den korte samtalen vi fekk over skuleplassen.

Med venleg helsing

Gro Nes Hommedal
Rektor
Høyanger skule
10. september 2022: Svar frå FAU til rektor Les
Hei igjen

Takk for utfyllande info, vi vil handsame saka på neste fau-møte. Hausthelsinga var stila til leiinga i oppvekst/kommune, og ikkje skulen. Årsaken er at vi fekk informasjon om at det på eit rektormøte er gjort eit (nytt preisert) vedtak på kommunalt nivå om reklameforbod for aktivitetar som kostar pengar (eller kan koste pengar). I prioritert rekkefølge er det viktigaste for oss:

1) Prosessar: Er det slik regelendringar/presiseringar vert etablert? Er ein ikkje behov for prosessar som involverer t.d. foreldre, elevar, tilsette(?), oppvekst og kulturutval og i dette tilfellet kanskje også frivilligheita og evt kulturetaten? I brevet linka vi til prosessar som har hatt liknande manglar (etter vårt syn)

2) Informasjon: I det første svaret ditt er du spørjande til kvifor vi ikkje tok dette direkte med skulen. Årsaken har eg nemnt. Vi ynskjer også, og har etterlyst, at oppvekst tek ei meir aktiv og medviten rolle i informasjonsarbeid. Det hadde vore naturleg med eit informasjonsskriv til lag/org om den nye praksisen (med grunngjeving, presiseringar, kven som har vedteke og kven ein skal henvende seg til for spørsmål), og at skrivet låg på kommunen si heimeside. Eg trur vi er samde om at informasjonsflyten i saka har vore alt anna enn optimal. Informasjonen du legg føre no, er ikkje heilt lik den skulemusikken fekk.

3) Reklame i skulen: I og med at det har vore mykje armar og bein i saka håpar vi kommunen kan skriftleggjere gjeldande retningslinjer/praksis saman med informasjon om kven som står som ansvarleg for vedtaket. Då kan vi handsame dette basert på klare fakta i neste FAU.

Vi skulle gjerne også ha visst om desse svara frå deg er å rekne som kommunen sitt offisielle svar til FAU, eller om vi skal rekne dette som at vi kastar ball - og får eit offisielt svar frå kommunen. Den offentlege dialogen vil leggjast ut som del av referatet etter neste fau-møte.

Mvh. Jeanette Walsvik

Leiar FAU
Svar frå rektor til FAU Les
Hei igjen

Eg skjønar at hausthelsinga dykkar ikkje var stila til meg, då eg ikkje var mottakar. De er FAU ved Høyanger skule, og saker som gjeld skulen må ta de tenesteveg. De burde ha tatt kontakt med meg så kan eg svare ut det eg kan svare på, før de eventuelt sender saka vidare. Eigentleg bør alle offisielle førespurnader gå via Samarbeidsutvalet ved skulen. Ved å sende skrivet slik de har stila det, òg med referanse til skulen, så hoppar de bukk over leddet de bør gå gjennom. Om det er noko de ønskjer å løfte til kommuneadministrasjonen og politikarane ved eit seinare høve, så vil eg gjerne at de fyrst drøftar saka/innhaldet med meg, og helst òg via Samarbeidsutvalet. Dette av den enkle grunn at de signerer med FAU Høyanger skule.

For å svare dykk ytterlegare ut:

1) Det er ikkje gjort noko vedtak på kommunalt nivå angåande reklamering i skulen. Det vi diskuterte i rektormøte var ei tolking av regelverket. Dersom vi og de ser eit behov for ei kommunal prosedyre så må vi spele inn ei sak på det. Då skal det sjølvsagt handsamast i alle råd og utval. Det er heilt rett som de skriv, at endringsframlegg og nye prosedyrar skal handsamast i alle organ, og på alle nivå. Førre skuleår handsama vi t.d. det kommunale ordensreglementet for alle skulane i kommunen, skulen sin sosiale kompetanseplan, og skulen sin plan for nærleik og trivsel. Dei to fyrste ein revisjon og den siste planen er heilt ny. Då har vi køyrt høyringsprosessar gjennom alle ledd og nivå, før endeleg vedtak. Det finnes som sagt ingen kommunal prosedyre for reklamering, og om det er behov for det, så må vi spele inn ei sak på det. Tolkingar og diskusjonar kring regelverket er ganske vanleg i driftsmøter (som rektormøta er).

2) Eg får ikkje heilt taket på kva de ønskjer og kor skoen trykkjer når det kjem til informasjon. De viser til oppvekst, og då må vi nesten snakke om kva for type informasjon de ønskjer. Hugs på at informasjonen frå oppvekst skal gå via skulen og til dykk i FAU. Eg trur dette er ein lengre diskusjon vi bør snakkast om. Eg veit ikkje om de har fått noko svar på skrivet de sendte, om de forventar det, eller om det blei sendt som ei orientering. Uansett så vil eg tru at mange av mottakarane nok ikkje vil respondere, då dykkar kontakt bør vere til og frå skulen.

3) Det er ikkje gjort noko kommunalt vedtak på praksis, vi nyttar retningslinjene i lovverket, som eg har vist til.

Mine svar er å rekne som svar frå rektor ved Høyanger skule. Om de vil få eit svar frå kommunen veit eg ikkje, men eg trur som sagt ikkje de kan rekne med det. Dersom de ønskjer at saka skal handsamast på kommunalt nivå og/eller politisk, så må vi sende ein førespurnad signert samarbeidsutvalet. Då viser vi at saka er handsama tenesteveg. Slik vi t.d. gjorde då vi spurde utvalsleiaren om den kommunevalde si rolle i samarbeidsutvalet. Då var saka fyrst diskutert i SU, og vi sendte ein offisiell førespurnad, signert samarbeidsutvalet v/Høyanger skule.

Dersom det er behov for eige møte med meg, eventuelt andre ved skulen, er det berre å ta kontakt. Er det ønskjeleg med hyppigare møter i SU, og saker til/frå SU så spelar de dette inn til neste SU møte. Då lagar vi årshjul og møteplan for Samarbeidsutvalet dette skuleåret.

Helsing

Gro
12. september: Brev frå Høyanger skulemusikk: Informasjon i skulen, om fritidstilbod for born og unge Les
Til FAU v/ Høyanger skule
v/ leiar Jeanette Friis Walsvik

Vi ynskjer med dette å setje fokus på moglegheitene frivillige lag og organisasjonar har til å kunne informere skuleklassar om dei fritidstilboda vi tilbyr i bygda. Høyanger skulemusikk (HSM) ynskjer å få informere om tilbodet vårt til eit spesifisert klassesteg, i dette tilfellet: 2.klasse.

Bakgrunn for førespurnaden:
Høyanger skulemusikk har streva med medlemstal, men er no inne i ein god trend. Medlemstalet veks og vi gledar oss stort over dette. Vi ser at vi har funne ei suksess-oppskrift, og ynskjer sjølvsagt å halde fram med denne: I fjor starta vi på eit rekrutteringsløp som gav svært gode resultat: 16 av 24 elevar i 2.kl byrja som aspirantar hos oss. Og dei er med oss framleis.

Dette fekk vi til av ulike grunnar: eit brennande engasjement for eit levande skulekorps, tallause dugnadstimar, timetildeling frå Kulturskulen, positive foreldre og ikkje minst: eit godt samarbeid med Høyanger skule: Vi fekk komme inn i klassen og informerte kort om tilbodet. Dette var avklart med administrasjonen ved skulen. Øvingane føregår i skulen sine lokale rett etter skuletid. Elevar, føresette og vi i HSM er svært nøgde med opplegget. Øvingar rett etter skuletid er positivt fordi det då ikkje kolliderer med andre fritidsaktivitetar t. d i regi av IL Høyang. Samarbeid mellom korps og idrettslag ser vi på som viktig, vi ynskjer ikkje å «sloss» om dei same ungane.

Som sagt; vi ynskjer å spinne vidare på suksess-oppskrifta vår: Rekrutteringsplanen var lagt, dirigenttimar tildelt frå Kulturskulen, instrument kjøpt inn. Infoskriv utarbeida og besøk i klassen var avtalt med kontaktlærar. Målet med besøket var kort å informere og invitere årets 2.klassingar til å prøve ut eit korpsinstrument. Samt dele ut ein informasjonsbrosjyre om tilbodet, som elevane kunne ta med heim til føresette. Besøket var avtalt kl 10.45, truleg var dette i lunsjen til elevane. Tilbodet er gratis dette første året. Om dei ynskjer å halde fram i Høyanger skulemusikk, har vi ein kontingent på 500kr frå og med neste sesong 2023/2024.

Som de forstår: vi var klar til ny innsats for eit levande fritidstilbod i bygda, og dermed bidra på vår måte til at Høyanger (kommune) skal bli ein attraktiv plass å bu på. Jmfr. uttalt mål «Høyanger 4000+»

Dagen etter at avtalen var inngått med kontaktlærar fekk vi melding frå skulen om at dei ikkje har lov å reklamere for noko type fritidsaktivitet som kostar pengar, eller på sikt vil koste pengar. Vi får ikkje komme på besøk å informere om tilbodet, vi får ikkje dele ut info-skriv, vi får ikkje henge opp plakatar. Dette vart bestemt på rektormøte, og gjeld alle skulane i kommunen, stod det i meldinga.

Det skal seiast at vi er kjend med gratisprinsippet i skulen, og vi veit at den økonomiske situasjonen til familiar i kommunen er svært ulik. Men vi ynskjer å få fram at for dei familiane som strevar med økonomien, så finnast det løysingar og støtteordningar som gjer at alle som vil kan få delta på dei fritidsaktivitetane dei ynskjer. Vi er gode på å hjelpe dei som treng det. Det skal også seiast at alt av naudsynt materiell ein musikant treng, vert dekka av korpset: t.d instrument, vedlikehaldsutstyr, uniform og anna utstyr.

Kontrameldinga i høve besøk i klassen kom svært «bardust» på oss, og gjorde informasjonsarbeidet vårt vanskeleg. Det sette ein kraftig brems på progresjonen. (Besøk i klassen skulle skje i veke 36, oppstart av kornett-grupper var sett til veke 37.)

I etterkant av dette har leiar i HSM vore i kontakt med både skulesjef, Stig Engen, og rektor ved Høyanger skule, Gro Hommedal.

Skulesjefen gav, i telefonsamtale onsdag 07.09.22, HSM løyve til å gi informasjonsbrosjyre til rektor, som skulle gi den vidare til kontaktlærar. Kontaktlærar skulle dele ut til klassen, vart det sagt i telefonsamtalen. Dette kompromisset fordi HSM hadde det travelt med å få ut info ift oppstartsdato. Vidare seier han at han ynskjer å skjerme undervisningstida i skulen. Denne skal brukast til undervisning, og ikkje til å informere om fritidstilbod. Det har vi forståing for, men kva med å få bruke 10-15 min til å informere medan elevane et nista si, eller å samle klassen rett etter skuleslutt (altså 10-15 min av SFO-tida) for å informere?

Fredag 09.09.22 sender rektor mail der ho skriv at dei ikkje kan dele ut brosjyrane likevel. Ho viser til opplæringslova § 9-6, og seier at skulen må skjerme elevane for individretta reklame og kommersielt press.

Vi etterlyser ein definisjon av omgrep her. Vil Høyanger kommune kalle informasjon om fritidstilboda i bygda for reklame? Å informere om ei musikk-gruppe for 2.klasse; er det å utsette elevane for kommersielt press?

Etter vårt syn: materiell om skulegensar, skulemjølk og skulefoto kan kallast for kommersiell reklame. Informasjon om fritidstilbod må definerast annleis. Ynskjer vi ikkje sunne, aktive og mentalt streke barn i bygdene våre? Musikk og idrett er med på å fremje trivsel, lærelyst og fysisk og psykisk helse. Dette bør vere av interesse for skulane også, og dermed håpar vi at vi kan samarbeide.

Vi viser til den samme Opplæringslova som rektor, der vi finn dette:
3.5 Unntak fra bestemmelsen – reklame fra lokalt kulturliv I Ot.prp. nr. 41 (2006-2007) blir det understreket at det ”framleis vil vere mogleg med reklameplakatar frå lokalt kulturliv om konsertar, utstillingar eller andre kulturell opplevingar.” Dette kan være reklame for lokale konserter, Ungdommens kulturmønstring, teateroppsetninger, skolerevy osv. Reguleringen av reklame i opplæringsloven § 9-6 og privatskoleloven § 7-1a er ikke tenkt å ramme denne formen for reklame. Det fremgår her at hensikten med bestemmelsen ikke er å vanskeliggjøre vilkårene for det lokale kulturlivet. Det må derfor legges til grunn at henvendelser til skolen fra lokalt kulturliv om å få sette opp reklameplakater og spre materiell for konserter, utstillinger eller andre kulturelle tiltak med et ikke-kommersielt preg bør aksepteres.

Skulesjef og rektor har no bestilt ei tavle der vi kan få henge opp informasjon om vår aktivitet. Dette finn vi positivt, men ser likevel behovet for å få dele ut informasjon til elevane, som dei kan ta med seg heim til føresette. Ei slik info-tavle trur vi vert vanskeleg å orientere seg på for dei yngste elevane.

Informasjonsbrosjyrane våre skal no vere lagt tilgjengeleg på SFO og i garderoben til 2.klasse. Dei som kjem over brosjyrane kan ta med seg ei heim. Foreldre har lagt info ut på Facebook-sida til klassen (det vart også gjort i fjor). I fjor fekk vi som sagt 16 påmeldte. Til samanlikning: I dag sit vi med 2 påmeldte frå årets 2.klasse. Vi kan difor konkludere med at å informere direkte i den aktuelle klassen, gir best resultat.

Rektor seier vidare at alle lag og organisasjonar må behandlast likt. Vi veit at IL Høyang dei siste åra ikkje har fått informert om sine tilbod i skulen. Eg har vore i kontakt med leiar i idrettslaget, som seier at han gjerne skulle ha informert i skulen, men at IL Høyang er ein større organisasjon enn HSM. Dei har ein meir sjølvgenererande rekruttering enn det korpset har. IL Høyang står sterkt i Høyanger. HSM treng meir drahjelp i sin rekrutteringsprosess. Vi er ein liten organisasjon, og er sårbare. Vi har vore nedleggingstruga, men ser no lys i tunellen med rekrutteringsløpet vi no har utarbeida.

Viser igjen til telefonsamtale med skulesjef 07.09.22, der underteikna spør om korleis tilsette i skulen skal forhalde seg til spørsmål frå lag og organisasjonar om å få informere om tilboda sine i klassane. Svaret var at ein må bruke sunn fornuft oppi dette.

Vi håpar at den sunne fornufta no trer fram.

Vi håpar FAU kan hjelpe oss med å få løyve til å gi informasjon om våre tilbod i klassane på skulen.

For styret i HSM:
Øygunn Gunnarskog – leiar

Last ned originaldokument

Vedtak

Tavleløysinga er eit godt tiltak. Vi stiller likevel spørsmål til om dette er ein informasjonsbærar som når elevar i alle aldrar og alle foreldre. Det kan også vera foreldre som har språk, lese- og skrivevanskar som vil få utfordringar med å ta til seg informasjon frå ei slik tavle. I praksis er det også sjeldan foreldre er innom aulaen.

Vi meinar det ikke er grunn til å forby ranselpost; spesielt for dei minste ungane – som i mindre grad evnar å ta til seg informasjon frå ei slik tavle. Likevel kan nokre reglar for ranselposten vera:
- Vera stila og retta mot foreldre
- I hovedsak vera informasjon – ikkje flyers med preg av reklame/marknadsføring
Innehalde all informasjon om både økonomiske og evt. dugnadsarbeid som følgjer deltaking
- Informasjon om evt. utstyr som krevast m kostnad
- Evt. ordningar for stønad, lån av utstyr osv.

FAU meinar det må vurderast både om og formen på ein evt presentasjon/informasjon til elevar i undervisningstida/på skulen. Spesielt dei yngste. Samstundes framhevar skulemusikken i brevet sitt nokre viktige moment; vil ein slik hard praksis føre til at dei litt smalare tilboda forsvinn? Vi meinar praksisen er feil / for streng tolking av lovverket og at det er ikkje lova nødvendigvis avgrensar dette. Vi kjenner heller ikkje til andre stadar der det vert praktisert så strengt.

I dialogmøtet mellom politikarar, oppvekstleiing, skuleleiing, elevar og FAU vart det også framført frå nytilflytta forelder: Det er vanskeleg som nytilflytta å få innsikt i fritidstilbod i tettstaden... Det er då ein føresetnad med oppsøkande foreldre for å finne tilboda som eksisterer.
Kommunalsjef for oppvekst følgde opp med Det er på FRITIDA ungdata viser dei største utfordringane.
– og leiar for oppvekstutvalet: Dei som fell utanfor dei organiserte aktivitetane er dei mest sårbare / dei som ikkje har tilbod..
Elevrådsrepr. uttalte om fritidstilbod og utanforskap: det er litt utfordrande på ein liten plass, gjerne.

Vi har vanskeleg for å sjå at ein slik praksis er ein god respons på desse attendemeldingane. Vi etterlyser då heller det rektor tek poengterer og vi etterlyste i dialogmøtet: Burde hatt ei samkøyring / samling av tilbod og når det er ulike aktivitetar...

Vi ser fram til å ta saka opp i SU. Som førebuing til dette skriv vi eit brev til elevrådet, utval for oppvekst, utval for kultur, kulturskulen, idrettslaget og FAU’ane hjå dei andre skulane – der vi ber om synspunkt / innspel til saka.